বঙাইগাঁও, ৭ছেপ্টেম্বৰ : মুখ্যমন্ত্ৰী হিমন্ত বিশ্ব শৰ্মা নেতৃত্বাধীন চৰকাৰে বাজেট অধিৱেশনত সিদ্ধান্ত লয় যে অসমৰ বিভিন্ন খিলঞ্জীয়া জনগোষ্ঠীৰ ভাষা,কলা-সংস্কৃতি,ধৰ্মীয় বিশ্বাস আদি সংৰক্ষণৰ বাবে খিলঞ্জীয়া জনগোষ্ঠীৰ বিশ্বাস আৰু সংস্কৃতি নামেৰে এটা বিভাগ সৃষ্টি কৰিছে। ইয়াৰ বাবে অসমৰ জিলাসমূহক চাৰিটা ভাগত বিভক্ত কৰি তাৰ অধীনৰ জিলাসমূহত একোটাকৈ দলক যাবলৈ নিৰ্দেশ দিয়া হৈছে। সেই দলটিয়ে নিৰ্দিষ্ট জিলাকেইখনৰ জনগোষ্ঠী যেনে কাৰ্বি,মিচিং,মৰাণ,মটক,তিৱা আদিকৰি বিভিন্ন জনগোষ্ঠীৰ ভাষা,কলা-সংস্কৃতি,বিশ্বাস আদি সম্পৰ্কত সেই জনগোষ্ঠীৰ নেতৃস্থানীয় লোক বা সাহিত্য-সংস্কৃতি চৰ্চা কৰা লোকৰ লগত মত বিনিময় কৰি তেওঁলোকৰ মতামতবোৰ প্ৰতিবেদন আকাৰে চৰকাৰক জনাব।
সেই উদ্দেশ্য লৈয়েই যোৱাকালি বিয়লি অসম বিধানসভাৰ অধ্যক্ষ বিশ্বজিত দৈমাৰী আৰু উপাধ্যক্ষ ডা:নোমল মমিন বঙাইগাঁৱত উপস্থিত হয়। বঙাইগাঁও জিলা উপায়ুক্তৰ সভাকক্ষত কোচ-ৰাজবংশী জনগোষ্ঠীৰ বিভিন্ন দল-সংগঠন,সাহিত্যিক,চিনেমা নিৰ্মাতা,কমতাপুৰ স্বায়ত্ব শাসিত পৰিষদৰ সদস্য তথা নেতৃস্থানীয় লোকৰ সৈতে বিধানসভাৰ অধ্যক্ষ শ্ৰী বিশ্বজিত দৈমাৰী আৰু উপাধ্যক্ষ ডা: নোমল মমিনে মত বিনিময় কৰে। এই জনগোষ্ঠীটোৰ কলা-সংস্কৃতি,ভাষা,খাদ্যাভ্যাস,গীত,নৃত্য আদি যদি সংৰক্ষণ কৰি ৰখা হয় তেতিয়া অইন জনগোষ্ঠীৰ লোকে বা বিদেশৰ পৰা অহা লোকেও সেই সংস্কৃতিৰ বিষয়ে খিলঞ্জীয়া বিশ্বাস আৰু সংস্কৃতিৰ বিষয়ে জানিব পাৰিব। গতিকে কোচ-ৰাজবংশী জনগোষ্ঠীৰ লোকসকলে চৰকাৰৰ লগত সহযোগ কৰক।
যোৱাকালি কোচ-ৰাজবংশী সন্মীলনী,কোচ-ৰাজবংশী গুৰু লোক সংস্কৃতি,কোচ-ৰাজবংশী ভাষাৰ সাহিত্যিক দ্বীজেন্দ্ৰ নাথ ভকত,কোচ-ৰাজবংশী চিনেমা নিৰ্মাতা নীলিময় প্ৰধানী,আলোচনী সম্পাদক ধনঞ্জয় সিংহ,কমতাপুৰ স্বায়ত্ব শাসিত পৰিষদৰ মুখ্য কাৰ্যবাহী সদস্য গোকুল বৰ্মন আৰু কাৰ্যবাহী সদস্য প্ৰদীপ ৰায়, বঙাইগাঁও কলেজৰ অধ্যক্ষা ৰূপাঞ্জলী দেৱী, অতুল চন্দ্ৰ ৰায়, কমল বৰ্মন, আক্ৰাছুৰ প্ৰাক্তন নেতা ক্ষীতিশ বৰ্মন, কমতাপুৰ স্বায়ত্ব শাসিত পৰিষদৰ কাৰ্যবাহী কাউন্সিলৰ হিমানী অধিকাৰী আদি বিশিষ্ট ব্যক্তিসকলে তেওঁলোকৰ মতামত দাঙি ধৰে।
0 Comments
Please do not enter any Spam Link in the comment box.